प्रधानमन्त्री प्रचण्डले वरिष्ठ उपप्रधानमन्त्रीको रुपमा विमलेन्द्र निधिलाई रोज्ने पक्का भएपछि बिच्किएका कमल थापा केपी ओलीको शरणमा पुगेका छन । कमल थापा र विमलेन्द्र निधिबीचको वरियताको विवादका कारण तीन साता देखि बस्न नसकेको क्याविनेट बैठक प्रचण्डले आफूपछिको वरीयतामा उपप्रधान तथा गृहमन्त्री विमलेन्द्र निधिलाई दिएर निधिलाई मनाउने भएका छन् ।
प्रधानमन्त्री प्रचण्डले निधिलाई वरियताको क्रममा दोश्रो नम्बरमा राख्ने भएसँगै रुष्ट भएका कमल थापाले समर्थन फिर्ता लिने सम्बन्धमा एमाले अध्यक्ष केपी ओलीसँग सल्लाह गरेका छन । निधि र थापाको वरीयता विवादका कारण मन्त्रिपरिषद्को बैठकसमेत प्रभावित बनेको छ । मन्त्रिपरिषद् बैठकबाट आफ्नो चीन भ्रमण स्वीकृत नगराई प्रधानमन्त्री प्रचण्ड भ्रमणमा गएका थिए । थापा सरकारमा सहभागी भएपछि मन्त्रिपरिषद्को बैठक एकपटक मात्र बसेको छ ।
पछिल्लो बैठक ३ चैतमा बसेको थियो । त्यसवेला प्रधानमन्त्रीले थापालाई आफूपछिको वरीयतामा राखेका थिए । निधि नयाँदिल्लीमा रहेकाले बैठकमा उपस्थित थिएनन् । थापा सरकारमा सहभागी हुनुअघि प्रधानमन्त्रीले आफूपछिको वरीयतामा निधिलाई राख्दै आएका थिए । आफू विदेश भ्रमणमा जाँदा कार्यबाहक प्रधानमन्त्रीको जिम्मेवारी पनि निधिलाई नै दिँदै आएका थिए । तर, चीन भ्रमणमा जाँदा भने विवादका कारण कसैलाई पनि कार्यबाहक दिएनन् ।
यता,प्रमुख प्रतिपक्षी नेकपा एमाले र सत्तारुढ राष्ट्रिय प्रजातन्त्र पार्टीका शीर्ष नेताहरुबीच स्थानीय तह निर्वाचन र सम्भावित सत्ता समीकरणबारे विशेष वार्ता भएको छ ।छलफलमा एमालेका तर्फबाट अध्यक्ष तथा पूर्वप्रधानमन्त्री केपी शर्मा ओली, पूर्वसभामुख तथा संसदीय दलका उपनेता सुवाषचन्द्र नेम्वाङ र नेता विष्णु पौडेल सहभागी थिए ।
राप्रपाका तर्फबाट अध्यक्ष एवं उपप्रधान तथा स्थानीय विकासमन्त्री कमल थापा तथा बुद्धिमान तामाङ र राजीव पराजुली सहभागी थिए । स्थानीय तह निर्वाचन, सम्भावित सत्ता समीकरण र संविधान संशोधन सम्बधी विषयमा छलफल भएको एमालेका ती नेताले जानकारी दिए ।पुष्पकमल दाहाल नेतृत्वको सरकारमा तेस्रो ठूलो हैसियतका साथ सहभागी राप्रपाले समर्थन फिर्ता लिए सरकार अल्पमतमा पर्ने छ ।
तर, उपप्रधानमन्त्रीको वरियतामा विवाद देखिएसँगै राप्रपा सरकारको विकल्प खोज्नसक्ने स्थितिमा देखिएको जानकारहरु बताउँछन् । – एस काठमाडौं
