पित्तललाई सुन भन्दै धीतो राखेर ‘सुनकर्जा’ दिने नेपाल बैंकका ११ जना कर्मचारी पक्राउ परेका छन् । प्रहरीको केन्द्रीय अनुसन्धान ब्यूरो यस्तो गैरकानुनी काम गर्ने कर्मचारीहरुलाई पक्राउ गरेको हो । शुक्रबार दिउँसो ब्यूरोको टोली धरान पुुगेको थियो । पक्राउ पर्नेमा नेपाल बैंक लिमीटेड धरान शाखाका गोल्ड लोन म्यानेजर होम भट्टराईसहित ११ जना छन् ।
प्रहरीको केन्द्रीय अनुसन्धान ब्यूरोका वरिष्ठ प्रहरी उपरीक्षक शेरबहादुर बस्नेतका अनुसार बैंकको केन्द्रीय कार्यालयको उजुरीपछी उनीहरुलाई पक्राउ गरिएको हो । कमसल धीतो राखेर सुन कर्जा दिएको भन्दै उनीहरुमाथि प्रचलित कानुन बमोजिम कारवाही प्रक्रिया अगाडी बढाइने बताइएको छ । प्रहरीको केन्द्रीय अनुसन्धान व्युरोले बैंकिङ कसुर गरी नेपाल बैंक लिमिटेडको धरान शाखालाई १५ करोड ५१ लाख रुपैयाँभन्दा धेरै नोक्सान पुर्याएको आरोपमा ११ जनालाई पक्राउ गरिएको हो ।
पक्राउ पर्नेमा त्रानेन्द्र पुरकुटी, सन्जित रसाइली, माधव रिसाल, सन्तोष रसाइली, सुनील विक, लालबहादुर विक, नेपाल बैंक लिमिटेडका निलम्बित खचान्जी होमबहादुर भट्टराई, तत्कालिन सहायक प्रबन्धकद्धय रामकिशोर मेहता र शंकर न्यौपाने, कर्मचारी सानुबाबु श्रेष्ठ र विराटनगर शाखाका प्रबन्धक पुष्पराज घिमिरे छन् ।
