प्रम ओलीले अपराह्न ३ बजे विश्‍वासको मत लिदै

काठमाडौं - प्रधानमन्त्री केपी शर्मा ओलीले आइतबार प्रतिनिधिसभामा विश्वासको मत लिने भएका छन् । नियुक्त भएको २५ दिनपछि ओलीले आज अपराह्न ३ बजे बस्ने संसद्को बैठकबाट विश्वासका मत लिन लागेका हुन् ।

प्रधानमन्त्रीमा नियुक्त भएको ३० दिनभित्र संसदमा विश्वासको मत लिनुपर्ने संवैधानिक व्यवस्था छ ।

प्रतिनिधिसभाका कुल २ सय ७५ सांसदमध्ये एमाले र माओवादी केन्द्रसँग मात्रै १७४ सांसद छन् । त्यसैगरी राष्ट्रिय जनता पार्टीका १७, संघीय समाजवादी फोरमका १६ र राष्ट्रिय प्रजातन्त्र पार्टीका एक सांसद गरी प्रधानमन्त्रीको पक्षमा २ सय ८ सांसद रहेका छन् ।

त्यसैगरी राष्ट्रिय जनमोर्चा, नयाँ शक्ति र नेपाल मजदुर किसान पार्टीका प्रधानमन्त्री ओलीको पक्षमा उभिन्छन् वा प्रतिपक्षमा अहिलेसम्म टुंगो लागेको छैन ।

प्रतिपक्षी दल नेपाली कांग्रेसका जम्मा ६३ जना मात्र सांसद छन् । एक चौथाई मत पुर्‍याउन कम्तिमा ६९ मत आवश्यक पर्छ । प्रतिपक्षमा एक चौथाईभन्दा कम मत भएमा महाभियोग, अविश्वासको प्रस्तावलगायतका विशेष प्रस्ताव लैजान सक्दैन । यसले ओली नेतृत्वको सरकार निकै शक्तिशाली हुने छ ।
प्रकाशित : Sunday, March 11, 2018
,

recent

Popular Posts