७८ करोड कर तिर्न पत्र आएपछि राष्ट्रिय वाणिज्य बैंकका पूर्वकर्मचारी बेहोस, '२ अर्ब ४२ करोडको कारोबार थाहै भएन'

  • अर्थ सरोकार सम्बाददाता 
काठमाडौँ - तपाईंले कुनै कारोबार नै गर्नुभएको छैन तर तपाईंको नाममा ७८ करोड रुपैयाँ तिर्न कर कार्यालयबाट पत्र आयो भने तपाईंको स्थिति के होला ? यस्तै भएको छ, राष्ट्रिय वाणिज्य बैंकका अवकाशप्राप्त कर्मचारी लीलाप्रसाद श्रेष्ठलाई । आफुलाई थाहा नै नभएको कारोबार उपर यति धेरै कर तिर्ने पत्र पाएपछि उनी बेहोस नै भए । कहिल्यै व्यापार नगरेका लीलाप्रसादलाई ७८ करोड तिर्नुपर्ने पत्र आएपछि उनी बेहोस भएका हुन् । दुई महिनाअघि उनको स्थायी ठेगाना फिदिम–३ मा आन्तरिक राजस्व कार्यालय बबरमहलले पठाएको थियो । सो कम्पनीले ७२ करोड भ्याट र ५ करोड ९९ लाख रुपैयाँ आयकर तिर्नुपर्ने कर कार्यालयले जनाएको छ ।

उनलाई आफन्तले अस्पताल पुर्याए । यो पत्रबारे धेरैले यो कसैको दुख दिने खेल हो भन्ने चर्चा भयो परिवारमा । कतिले पत्र नक्कली हो भने । तर पत्र सक्कली नै थियो । पत्रमा लेखिएको थियो, ‘तपाईंको नाममा रहेको सुन्द्रादेवी टेलिटक प्रालि (स्थायी लेखा नम्बर ६०२४१८४२१)ले कर दाखिला नगरेको हुँदा यस कार्यालयमा उपस्थित हुनुहोला ।’ त्यसपछि उनको परिवारले कर कार्यालयमा गएर विवरण हेर्यो । विवरण हेर्दा थाहा भयो कि उनको हराएको नागरिकता प्रयोग गरेर कम्पनी दर्ता गरी करोडौंको कारोबार गरिएको रहेछ । आर्थिक वर्ष ०७१/७२ को ९ महिनाको अवधिमा सो कम्पनीले २ अर्ब ४२ करोडको कारोबार गरेको थियो । त्यसपछि कर कार्यालयमा सम्पर्क नराखेपछि नागरिकताका आधारमा लीलाप्रसाद श्रेष्ठको नाममा पत्र लेखिएको थाहा भयो । त्यसपछी उनले सीआइबी गुहारे ।

सीआइबीले नेपाल स्याटेलाइट नेपाल प्रालिसँग सहकार्य गरी एनसेलको सिम तथा रिचार्ज कार्ड बिक्रीको जिम्मा सो कम्पनीले लिएको र ९ महिनामा २ अर्ब ४२ करोडको कारोबार गरेको खुल्यो । तर कारोबार यति धेरै गरेपनि कर तिरिएको थिएन । लीलाप्रसाद श्रेष्ठ स्याटेलाइट कम्पनी गएर बुझ्दा विजयनारायण श्रेष्ठ नामका व्यक्तिले कारोबार गरेको खुलेपछी सीआइबी थप अनुसन्धानमा लाग्यो । सीआइबीले काभ्रे घर भएका विजयनारायण श्रेष्ठलाई पक्राउ ग-यो । त्यसपछि थाहा भयो कि उनले लीलाप्रसादको नागरिकता कोटेश्वरको बाटोमा भेट्टाएका रहेछन् । नागरिकताका आधारमा कम्पनी दर्ता गरियो र अरवौंको कारोबार भयो । 

सिआइबीका अनुसन्धान अधिकृत डिएसपी कवित कटवालले दिएको जानकारी अनुसार विजयनारायण१ लाख धरौटीमा छुटेका छन् ।
प्रकाशित : Thursday, January 10, 2019

recent

Popular Posts