कलैया । कोहि-कोहि मान्छे कति आँटिला हुन्छन् । बैंकको सेक्युरिटीमा यस्तै आँटिला मान्छेको आवश्यक पर्छ । यस्तै भएको छ एनसीसी बैंकको हकमा पनि । बिहिबार राती बाराको एनसीसी बैंकका सुरक्षा गार्डले शाखा लुटिनबाट जोगाएका छन् ।
बैंक लुट्न गएका ती लुटेरालाई बैंकका सुरक्षा गार्डले समातेर प्रहरीलाई बुझाएका छन् । बैंकको पैसा लुट्न भनेर बैंकको छतबाट छिरेर मूलढोकाको तार काट्ने मात्र होइन, लुटेराले सीसीटिभीको तारसमेत काटिसकेका थिए । लुटेरा भर्खर १७ वर्षका किशोर थिए । चोरीको सुइको पाएपछि बैंकका सुरक्षा गार्ड साहेव प्रसाद यादवले ती किशोरलाई पक्राउ गर्न सफल भएका थिए ।
‘पहिला च्याप समातें, लात्तीले भाकुरें, अनि प्रहरीलाई बुझाएँ। ‘ उनले भनेका छन् । बैंक टुटेरालाई पक्राउ गरेर बहादुरी देखाएको भन्दै उनलाई प्रहरीलेसमेत सम्मान गरेको छ । यादवको कार्यको प्रशंसा गर्दै जिल्ला प्रहरी कार्यालय बाराका प्रहरी उपरीक्षक सानुराम भट्टराईले नगद ५ हजारसहित पुरस्कृत गरेका हुन् । घटनाबारे थप अनुसन्धान भइरहेको प्रहरीले जनाएको छ ।
