टाटा मोटर्सका गाडी किन्दा ९० प्रतिशतसम्म फाइनान्सको सुविधा


काठमाडौं – नेपालका लागि टाटा मोर्टसको एकमात्र आधिकारिक वितरक सिप्रदी ट्रेडिङ्गले टाटा मोटर्सको गाडीहरू किन्ने योजनामा रहेका ग्राहकहरूका लागि अब ९० प्रतिशतसम्म फाइनान्सको सुविधा प्रदान गर्ने भएको छ । ट्रेडिङ्गले सांग्रिला विकास बैंक तथा सानिमा बैँकसँग सो सम्वन्धि सम्झौता गरेको छ ।

भेइकल लोनअन्तर्गत कमर्सियल गाडीहरू, सेमी–कमर्सियल गाडीहरू तथा प्यासेन्जर भेइकल (यात्रुवाहक गाडीहरू) खरिदका लागि दुईवटा बैँकहरूसँग सिप्रदीले भेइकल लोन (गाडी कर्जा) सम्बन्धी सम्झौतामा हस्ताक्षर गरिएको हो ।

उक्त सम्झौताअन्तर्गत सांग्रिला विकास बैँकबाट भ्याट बिलमा उल्लेख भएबमोजिम मूल्यको ९० प्रतिशतसम्म फाइनान्सको सुविधा प्रदान गरेको छ र यात्रुवाहक गाडीहरू किन्न भ्याट बिलमा उल्लेख भएबमोजिमको मूल्यको ५० प्रतिशतसम्म फाइनान्सको सुविधा प्रदान गरिएको छ ।

कमर्सियल गाडी र सेमी(कमर्सियल गाडीहरूको कर्जा पाँच वर्ष भित्र चुक्ता गर्नुपर्छ भने यात्रुवाहक गाडीहरूको कर्जा सात वर्ष भित्र तिरिसक्नुपर्छ । सिप्रदी कम्पनीजका उपाध्यक्ष श्री सौरभराज थपलियाको उपस्थितिमा सिप्रदीका तर्फबाट सेल्स तथा मार्केटिङ्गका जेनरल म्यानेजर अनुपमणि ढकाल र सांग्रिला विकास बैंकका प्रमुख कर्जा अधिकारी रंजित मास्केले सो सम्झौतापत्रमा हस्ताक्षर गरे ।

सानिमा बैँकसँग भने सिप्रदीले च्यासिसको मात्र फाइनान्स गर्ने सम्झौता हस्ताक्षर गरेको छ । भ्याट बिलमा उल्लेख भएअनुसार गाडीको कुल मूल्यको बढीमा ७० प्रतिशत तिर्न चाहने ग्राहकहरूले गाडी कर्जा प्राप्त गर्न सक्नेछन् । 

कर्जा चुक्ता गर्नका लागि ग्राहकहरूले पाँच वर्षको समयावधि पाउनेछन् । सिप्रदी कम्पनीजका उपाध्यक्ष सौरभराज थपलियाको उपस्थितिमा सिप्रदीका तर्फबाट सेल्स तथा मार्केटिङ्गका जेनरल म्यानेजर अनुपमणि ढकाल र सानिमा विकास बैंकका रिटेल लेन्डिङ विभागका प्रमुख हेमराज संजेलले सो सम्झौतापत्रमा हस्ताक्षर गरे ।

सिप्रदीका अनुसार ग्राहकहरूको पहिलो रोजाई बन्ने कम्पनीको उद्देश्यअनुरूप उक्त सम्झौता गरिएको हो । टाटाका गाडीहरू किन्ने योजनामा रहेका ग्राहकहरूलाई सम्झौताहरूले आर्थिक रूपमा सहज बनाइदिने सिप्रदीको विश्वास छ । अब टाटाका गाडीहरू खरिद गर्ने ग्राहकहरूका लागि सहज पैसा तिर्ने प्रणाली र प्रकिया छिटो अघि बढ्नेछ भने कागजात गर्न झञ्झट हुनेछैन ।
प्रकाशित मिति : Thursday, August 29, 2019

recent

Popular Posts

© Shubham Media Pvt. Ltd. All Rights Reserved 2019. Artha Sarokar® Trademark Registered. Regd. No. : 047796 Maintained By : Eservices Nepal