प्रहरीको टोलीले उनीमाथि थप ‘सर्च’ गर्यो । उनको साथबाट मोबाइल ४ थान, बिभिन्न किसिमका १० वटा चाबीहरुसहितको झुप्पा १ थान, विभिन्‍न बैंकको १० थान एटीएम कार्ड, चाइनिज युआन २ हजार ३ सय ८२ , अमेरिकी डलर ६५ र नेपाली २ हजार ११० रुपैयाँ बरामद भयो । नियन्त्रणमा लिएपछि प्रहरीले उनीमाथि थप अनुसन्धान गर्यो । उनी बस्ने होटल, उनी नेपाल कहिले आएका थिए भन्ने महत्वपूर्ण विवरण प्रहरीले हात पारिसकेको छ । यसै अनुसार उनीमाथि प्रहरीले थप अनुसन्धान गरिरहेको छ ।

बुधबारको घटना थाहा पाउने बित्तिकै काठमाडौँका एटिएम बुथहरुमा उच्च सतर्कता अपनाईएको छ । एटिएम बुथभित्र चिनियाँ पस्नेबित्तिकै सार्है सतर्क भएर निगरानी गर्नु र केहि शंका लागे प्रहरीलाई खबर गरिहाल्न बैंकका सम्बन्धित कर्मचारीहरुलाई निर्देशन दिइएको छ । प्रहरीभित्र पनि बैंकबाट कसैको शंकास्पद गतिविधिबारे खबर आए तुरुन्त एक्सनमा उत्रिनु भन्ने निर्देशन सम्बन्धित पक्षलाई दिइएको छ । ‘हामीले हाम्रा कर्मचारीहरुलाई उच्च सतर्कता अपनाउन निर्देशन दिइसकेका छौं ।’ एक बैंकका प्रमुख कार्यकारी अधिकृतले अर्थ सरोकार डटकमसँग भने, ‘केहि समय अघि प्रभु बैंकमा ह्याकको प्रयास भयो । हिजो मेगा बैंकमा भयो भनेपछी भोलि हाम्रो बैंकमा पनि यस्तो प्रयास नहोला भन्न सकिन्न । त्यसैले हामीले उच्च सतर्कता अपनाएका छौं ।’ उनका अनुसार हिजोको घटनापछी सबैजसो बैंकले आआफ्ना कर्मचारीहरुलाई एटिएमको हकमा उच्च सतर्कता अपनाउन निर्देशन जारी गरिसकेका छन् ।

यसो त नेपाली बैंकहरुमा चिनियाँ ह्याकरहरुको दबदबा बढ्दा त्यसको दोष राज्यको पनि छ । केहि समय अघि प्रहरीले चिनियाँ ह्याकरहरुलाई पक्राउ गर्यो, तर त्यसपछी पनि चिनियाँहरुको शंकास्पद धन्दामाथि कसैको नजर गएन । केहि महिना अघिकै घटना हेर्ने हो भने पनि नेपाल टेलिकमका २००० बढी सिमकार्डसहित प्रहरीले त्रिभुवन अन्तराष्ट्रिय विमानस्थलबाट केहि चिनियाँहरुलाई पक्राउ गरेको थियो । यो घटनाले पनि नेपाली बैंकहरु ह्याक गर्ने चिनियाँहरुको कतिको ठुलो तयारी छ भन्ने बुझ्न गाह्रो छैन । तर प्रहरी प्रशासनले पनि यो कुरालाई त्यति ध्यान दिएको भने पाइदैन । एटिएम बुथमै ह्याकर पुगेपछि समात्नुभन्दा पनि त्यहाँसम्मको कामलाई नै निस्तेज गर्न सम्बन्धित पक्षले खास काम गरेको पाईदैन।

केहि समयअघि ह्याकरको समूहले प्रभु बैंकको एटिएम ह्याक गर्न खोज्दा बैंकका कर्मचारीले समयमा नै थाहा पाए र प्रहरीलाई खबर गरे । जसका कारण ह्याकरको टोली समातियो । बुधबार पनि समयामा नै प्रहरीलाई सुचना पुग्यो र चिनियाँ नागरिक पक्राउ परे । केहि चिनियाँ नागरिकहरु पक्राउ परे पनि काठमाडौँका विभिन्न होटलमा चिनियाँ नागरिकहरुको ठुलो समूह बसेको सूचना प्रहरीसंग नै छ । तर को के कामले आएको छ भन्ने यकिन विवरण प्रहरीले खोजेकै छैन । यसले समग्र नेपालका बैंकहरु ह्याकरको निशानामा परेका छन् भन्ने बुझ्न गाह्रो छैन । यस विषयमा सबन्धित सबै पक्षले सतर्क भएर अगाडी बढ्नुपर्ने विज्ञहरुको सुझाव छ ।

यसो त नेपालमा चिनियाँ ह्याकरहरु सक्रिय भएको धेरै अघिदेखि हो। नेपालमा पहिलोपटक एटिएममार्फत पैसा ठगी गर्ने गिरोह नै चिनियाँ गिरोह थियो । करिब ११ वर्षअघि नेपालमा भर्खरै नयाँ प्रविधि भित्रिंदै गर्दा सो प्रविधिमाथि धावा बोल्दै एक चिनियाँ समूहले पिन कोड चोरी गरी एटीएममार्फत अनधिकृत रूपमा पैसा निकालेका थिए । सुरु सुरुमा चिनियाँहरु पैसा चोर्ने फन्डा फरक थियो । आफूहरूले एटीएमबाट पैसा निकाल्न नजानेको भन्दै पैसा निकाल्न सिकेको बहाना गरी, पिन नम्बर चोरेर, एटीएम मेसिनमा डाटा चोर्ने प्रविधि राखेर उनीहरु ठगी धन्दा चलाउँथे । अहिले प्रविधि फरक छ, तर प्रवृति भने उही छ ।