काठमाडौं -लगानीकर्ता स्टान्डर्ड चार्टर्डको एफपीओतिर लागेपछि सेयर बजारमा त्यसको प्रत्यक्ष असर परेको छ । बिक्री चाप बढ्दा मंगलबार नेप्से सूचक ८.१४ विन्दुले तल झरेर १३४७.०९ अंकमा आइपुगेको छ । पछिल्लो केही दिनयता नेपाल लाइफको एफपीओ र फरवार्ड कम्युनिटीको आइपीओ नपरेको पैसा फिर्ता हुँदा बजारमा सकारात्मक प्रभाव देखिएको थियो । तर मंगलबारदेखि ठूलो परिमाणमा चार्टर्डको एफपीओ खुलेकाले लगानीकर्ता त्यतातिर आकर्षित भएका हुन् । समग्रमा बजार ०.६० प्रतिशतले तल झरेको छ ।

पछिल्लो समय सेयर बजारलाई बढ्दो बैंक ब्याजदरले असर गर्दैआएको छ । अधिकांश बैंकले सेयर कर्जा पनि दिन छाडेका छन् । यसबाहेक बढ्दो हकप्रद र बोनसले पनि बजारमा सेयर आपूर्ति बढाएको छ । मंगलबार कुल १३७ कम्पनीको ५२ करोड ८५ लाख रूपैयाँभन्दा धेरैको सेयर कारोबार भएको छ । इन्भेस्टमेन्ट बैंकको संस्थापक सेयरले समग्र कारोबार रकम बढाएको हो । तर यो बैंकको संस्थापक सेयरमा पनि ठूलो संख्यामा म्याचिङ कारोबार भएको देखिन्छ । 

उत्पादनमूलकबाहेक बाँकी सबै समूहका सूचक राताम्य भएका छन् । वाणिज्य बैंक समूहको सूचक ११।७२ विन्दुले तल झरेको छ । यसैगरी होटेल सूचक पनि २७।२ अंकले ओर्लिएको छ । कारोबार रकममा नेपाल इन्भेस्टमेन्ट बैंकको संस्थापक सेयरले अग्रता लिएको छ । इन्भेस्टमेन्टको संस्थापक सेयर २१ करोड रूपैयाँभन्दा धेरैको कारोबार भएको हो । यसैगरी, कारोबार रकमका आधारमा दोस्रो र तेस्रो स्थानमा एसियन लाइफ इन्सुरेन्स र सानिमा बैंक परेका छन् ।