• अर्थ सरोकार सम्बाददाता 

काठमाडौँ – कालोबजारी ऐन विपरित काम गर्दै नेपाली जनता ठग्दै आएको कम्पनीले कुनै अवार्ड पायो भन्ने सुन्दा अचम्म नमाने हुने भएको छ ।  किनकि  २०% भन्दा बढी नाफा खाएर गाडी बेच्न नपाउने भन्ने स्पष्ट व्यवस्था हुँदा हुँदै पनि एउटै टक्सन गाडीमा २५ लाखसम्म कुम्ल्याउन पल्केको लक्ष्मी इन्टरकन्टिनेन्टल प्रा.लिले यस्तै अवार्ड हात पार्न सफल भएको छ ।  

कोरियाली मोटर उत्पादक कम्पनी हुण्डाईको नेपालका लागि आधिकारिक विक्रेता लक्ष्मी इन्टरकन्टिनेन्टल प्रा.लिले एशिया तथा प्यासिफिक क्षेत्रको रिजनल एक्सिलेन्स अवार्ड २०१६ हात पारेको छ । मे १० तारिखदेखि १३ तारिखसम्म दक्षिण कोरियामा सम्पन्न हुण्डाई ग्लोबल डिस्टि्रीब्युटर कन्भेन्सनमा लक्ष्मीले सो अवार्ड हात पारेको हो ।

प्राप्त जानकारी अनुसार हुण्डाइको ५० बर्षीय यात्राको उपलक्ष्यमा आयोजित एक विशेष कार्यक्रममा यस्तो अवार्ड प्रदान गरिएको हो । कुल १३२ देशबाट २४८ जना हुण्डाई गाडीका वितरक तथा बिक्रेताहरु उपस्थित को उक्त कार्यक्रममा लक्ष्मी इन्टरकन्टिनेन्टलले क्षेत्रीय रुपमा उत्कृष्ट पर्फमेन्स गरेको भन्दै एक्सिलेन्स अवार्ड प्रदान गरिएको हो ।