निर्माण व्यवसायी महासंघका अध्यक्ष गौचनको हत्याबारे नेकपाले मुख खोल्यो

काठमाडौँ  – निर्माण व्यवसायी महासंघका अध्यक्ष शरद गौचनको हत्याप्रति विप्लव नेतृत्वको नेपाल कम्युनिष्ट पार्टी (नेकपा) ले आपत्ति जनाएको छ । उसले घटनाप्रति दुःख व्यक्त गर्दै दोषीलाई तत्काल कारबाहीको दायरामा ल्याउन र पीडितलाई क्षतिपूर्ति दिन सरकारसँग माग गरेको छ ।

बुधबार नेकपाका महासचिव नेत्रविक्रम चन्द विप्लवले एक विज्ञप्ति जारी गर्दै राज्यको निरीहताका कारण गम्भीर प्रकृतिको घटना भएको भन्दै दोषीमाथि कारबाही र पीडितलाई क्षतिपूर्ति दिन माग गरेका हुन् । सरकार भ्रष्टाचार, राष्ट्रघातसँगै जनताको विपक्षमा उभिएकाले जनताको जिउ–धन असुरक्षित भएको विप्लवको भनाइ छ ।

‘राज्यको जिम्मा लिएका व्यक्तिहरु देश लुट्ने भ्रष्टाचार, देश बेच्ने राष्ट्रघात, जनताको दमन गर्ने जनघात र जनताको जीवनप्रति खेलवाड डर्ने कार्यमा लिप्त भएकाले जिम्मेवार नागरिकहरुले यो दुःखद् घटना बेहोर्नु परेको हो’, विप्लवद्वारा हस्ताक्षरित विज्ञप्तिमा भनिएको छ । विप्लवले संसदीय व्यवस्था असफल भएकाले यस्ता घटनाहरु दिनप्रतिदिन बढ्दै गएको दाबी गर्दै वैज्ञानिक समाजवादमा समेत जोड दिएका छन् ।

यसैबीच, विप्लवले सांग्रिला होटलका क्यासिनो सञ्चालक राजेन्द्र बजगाईको घरमा बम राख्ने काममा पार्टीको कुनै संलग्नता नभएको प्रष्ट पारेका छन् । क्यासिनो सञ्चालक बजगाईले नेकपाका प्रवक्तालाई भेट्न नमानेपछि आफ्नो घरमा बम राखिएको भन्दै राष्ट्रिय मानव अधिकार आयोगमा निवेदन दिएलगत्तै विप्लव नेतृत्वको नेकपा माओवादीबाट यस्तो प्रतिक्रिया आएको हो । - काठमाडौँ टुडे 
प्रकाशित : Wednesday, October 11, 2017
,

recent

Popular Posts