काठमाडौँ – खानेपानीमन्त्री बिना मगरले मेलम्चीको पानी दशैँअघि नै काठमाडौँ उपत्यकामा ल्याईपुर्याउने बताएकी छन् । उनले भनिन् ‘हिमाल, पहाड, तराई र सहरी क्षेत्रका जनतालाई स्वच्छ र स्वस्थ्य खानेपानी दिन सक्नु मेरो प्रमुख कार्यभार हो । सुन्दर बस्ती र सहरको आधारभूत मापन स्वच्छ खानेपानी भएकाले पूरा गर्न हामी लागेका छौँ ।’
तराईका सबै जिल्लामा खानेपानी आपूर्ति सहज बनाउन महाकाली नदीको पानी कन्चनपुरमा ल्याउने, कर्णालीको पानी कैलाली र बर्दियासम्म वितरण गर्ने योजना छ, उनले भनिन् । सबै बस्तीमा प्रशोधनसहितको ढल विकासलाई प्राथमिकता दिएका छौँ । कार्यकाल सकिँदा प्रत्येक घरमा रहेको धाराको टुटी खोल्दा हावा होइन, पानी झरोस् भन्ने हिसाबले काम गर्न खोजिरहेकी छु ।
उनले भनिन् ‘मैले मन्त्रालय सम्हाल्नुअघि मेलम्ची आयोजनामा अवरोध थियो, म आएर अवरोध खुलाएँ । अहिले फेरि अवरोध आएको मैले सुनेकी छु ।’ यस्ता अवरोधलाई दीर्घकालीन रूपमै समाधान गरी काम अघि बढाउन र दसैँअघि नै काम सक्न निर्देशन दिइसकेको उनले बताइन् ।
मेलम्चीको पानी राजधानीबासीलाई दसैँको उपहारस्वरूप दिने गरी काम भइरहेको पनि उनले बताइन् ।
